भटक्या विमुक्त जमातींचा राजकीय स्वतंत्र मार्ग ९ जूनला स्पष्ट होणार

भटक्या विमुक्त जमातीचे पुण्यात 9 जूनला राष्ट्रीय अधिवेशन, अॅड. प्रकाश आंबेडकरांची प्रमुख उपस्थिती

जितरत्न पटाईत –

पत्रकार परिषदेला उपस्थित मान्यवर.

पुणे –  आजतागायत इथल्या प्रस्थापित राजकीय पक्षांनी भटक्या विमुक्त जमाती, वंजारी, धनगर, पूर्वाश्रमीचे अस्पृश्य जाती आदींचा फक्त वापर करुन घेतला आहे. इथल्या धर्मनिरपेक्षवादी संघटना, पक्षांनी “आमचा फक्त वापर केलाय” अशी भावना इथल्या वर्गामध्ये वाढत चालली आहे. त्यांचे प्रश्न, समस्या सोडवण्यात आल्या नाहीत. या समाजातील तरुणांमध्ये आम्ही “सोशल फोर्स” म्हणून उभे राहू, स्वताची ताकद निर्माण करु व इथल्या सत्तेमध्ये सहभागी होऊ अशी भावना निर्माण झालीय. या भूमिकेचे आम्ही स्वागत करतो. त्यांच्या भूमिकेला आमचा पाठींबा आहे व त्यांच्याबरोबर आम्ही आहोत. असे प्रतिपादन अॅड. प्रकाश आंबेडकर यांनी केले. पुण्यात आयोजित पत्रकार परिषदेत ते बोलत होते. यावेळी भटक्या विमुक्त जमाती संघटनेचे अध्यक्ष पद्मश्री उपराकार लक्ष्मण माने, विवेक मोरे आदी उपस्थित होते.

यावेळी बोलतांना अॅड. आंबेडकर म्हणाले की, आमच्या न्याय हक्काचा लढा आम्हालाच लढावा लागेल. पुण्यात 9 जून रोजी होणारी परिषद त्याची नांदी आहे. 20 मे रोजी धनगर समाजाचा पंढरपूर येथे होणारा “सत्ता संपादन निर्धार मेळावा” हा देखील महाराष्ट्राच्या राजकारणाला कलाटणी देणारा ठरेल. 9 जून रोजी होणाऱ्या भटक्या विमुक्त जमातीच्या परिषदेस आमचा पाठींबा आहे. या मेळाव्याला सर्वांनी उपस्थित राहवे असे आवाहनही त्यांनी केले आहे.

यावेळी लक्ष्मण माने म्हणाले की, इथुन पुढे आम्ही कोणत्याही राजकीय पक्षांच्या दारात भीक मागण्यासाठी जाणार नाहीत. सन्मानाने जे आम्हाला वागवतील त्यांच्यासोबत आम्ही जाऊ. मदतीसाठी अाम्ही झोळी घेऊन हिंडणार नाही. अशी भूमिका आम्ही घेतली आहे. आम्ही आता अॅड. प्रकाश आंबेडकर यांच्यासोबत आहोत.  आम्ही सर्व एकत्र आल्यावर निश्चितच आमचे प्रश्न आम्ही सोडवू, असे प्रतिपादन भटक्या विमुक्त जमाती संघटनेचे अध्यक्ष पद्मश्री उपराकार लक्ष्मण माने यांनी केले. या अधिवेशनाला महाराष्ट्रातील सर्व बहुजन समाजाने उपस्थित रहावे असे आवाहन ही त्यांनी केले.

महाराष्ट्राची वाटचाल अकोला पॅटर्नच्या दिशेने –

संपूर्ण महाराष्ट्रामध्ये प्रसिध्द असलेला अकोला पॅटर्नच्या दिशेने महाराष्ट्राच्या राजकारणाची वाटचाल होतांना दिसत आहे. सत्तेमध्ये समाजातील सर्व घटकांना प्रतिनिधीत्व देण्याचा अकोला पॅटर्न महाराष्ट्रभर गाजला आहे. यामध्ये अल्पसंख्यांक, आदिवासी, भटके विमुक्त, अलुतेदार-बलुतेदार, महिला आदिंना सत्तेमध्ये सहभाग मिळाला आहे. राज्यातील अनेक वंचित समूह अॅड. प्रकाश आंबेडकरांच्या नेतृत्वाखाली एकत्र येत आपल्या न्यायासाठी लढा देताय. त्यामुळे “महाराष्ट्राची वाटचाल अकोला पॅटर्नच्या दिशेने” होत आहे असं चित्र निर्माण होतांना दिसत आहे.

By | 2018-05-16T13:51:19+00:00 मे 16th, 2018|News|0 Comments